سعودی عرب سے عراق اور کویت سے ایران تک ریت کے طوفانوں نے مشرق وسطیٰ کو اپنی لپیٹ میں لے رکھا ہے جس کی وجہ سے پروازوں میں تاخیر، اسکول بند ہونے اور ہزاروں افراد کو سانس لینے میں دشواری کے ساتھ اسپتال میں داخل ہونا پڑا۔
ماہرین نے خبردار کیا کہ موسمیاتی تبدیلی مزید خراب ہو سکتی ہے جس کی وجہ سے آنے والے برسوں میں ناخوشگوار موسمی واقعات رونما ہوسکتے ہیں۔
سعودی عرب میں ریت کے طوفان کے نتیجے میں ایک ہی دن میں تقریباً 1,285 افراد کو ریاض کے اسپتالوں میں داخل کیا گیا جو کہ سانس کی تکلیف میں مبتلا ہوئے۔
عراق کو بھی رواں ہفتے شدید ریت کے طوفانوں کا سامنا کرنا پڑا ہے۔ اپریل کے وسط کے بعد سے اس کا آٹھواں ریت کا طوفان پیر کو آیا۔ کم از کم 4,000 افراد کو سانس لینے میں دشواری کے باعث ہسپتالوں میں زیر علاج رکھا گیا اور ملک بھر میں ہوائی اڈے، اسکول اور عوامی دفاتر بند کر دیے گئے۔
