معروف بھارتی گلوکار کرشنا کمار کناتھ المعروف کے کے کی بیٹی نے والد کے لیے جذباتی پیغام جاری کیا ہے۔
گلوکار کی بیٹی نے اپنی انسٹاگرام اسٹوری میں والد کی آخری رسومات کی تفصیلات شیئر کیں۔
اُنہوں نے والد کے لیے جذباتی انداز میں لکھا کہ میں آپ سے ہمیشہ پیار کروں گی۔
واضح رہے کہ گلوکار کی آخری رسومات آج ممبئی میں ادا کی جا رہی ہیں۔
بھارتی میڈیا کے مطابق گلوکار 31 مئی کو کولکتہ میں ایک شو سے واپسی کے بعد، نیو مارکیٹ تھانے کے علاقے کے تحت واقع گرینڈ ہوٹل میں گر گئے تھے اور اُنہیں شہر کے ایک نجی اسپتال لے جایا گیا، جہاں انہیں مردہ قرار دیا گیا تھا۔
یاد رہے کہ کے کے کی پہلی البم ’پل‘ 1999 میں ریلیز ہوئی تھی تاہم اس کے بعد انہوں نے بالی ووڈ میں گانوں پر توجہ دی۔
انہوں نے بلاک بسٹر فلم ’ہم دل دے چکے صنم‘ کا مشہورِ زمانہ گیت ’تڑپ تڑپ کے‘، فلم ’دس‘ کا گیت ’دس بہانے‘، فلم ’غنڈے‘ کا گانا ’تو نے ماری انٹریاں‘ اور فلم ’وہ لمحے‘ کا مشہور گیت ’کیا مجھے پیار ہے‘ بھی گایا جبکہ فلموں میں ان کے گانوں کی ایک طویل فہرست موجود ہے۔
