خانیوال: کراچی سے پنڈی جانے والی پاکستان ایکسپریس کی بوگیاں فرید آباد میں انجن سے علیحدہ ہوگئیں۔
پاکستان ایکسپریس کی بوگیاں ریلوے اسٹیشن سے کچھ فاصلے پر علیحدہ ہوئیں۔ بوگیوں کو انجن سے ملانے والا جوائنٹ اچانک ٹوٹ گیا جس کے نتیجے میں انجن آگے نکل گیا اور بوگیاں پیچھے رہ گئیں۔ شدید جھٹکے لگنے کے باعث مسافر برتھوں سے گرگئے اور ان میں شدید خوف و ہراس پھیل گیا۔
حکام کے مطابق ٹرین سے علیحدہ ہونے والی بوگیاں فرید آباد کے نزدیک کھڑی ہیں۔ پاکستان ایکسپریس کے مسافروں نے تاخیر پر شدید احتجاج کیا۔ مسافر تاحال بے سروسامانی کی حالت میں انتظامیہ اور امداد کے منتظر ہیں۔ جناح ایکسپریس حادثے کے باعث تمام ٹرینیں گھنٹوں تاخیر کا شکار ہوگئیں۔
