راولپنڈی : آرمی چیف، چیف آف ڈیفنس فورسز فیلڈ مارشل عاصم منیر کا کہنا ہے کہ قانون نافذ کرنا مقدس امانت ہے، مضبوط، پیشہ ور، عوام دوست فورس داخلی سلامتی و قانون کی حکمرانی کیلئے ناگزیر ہے، مسلح افواج ہمیشہ بہادر اور وقار پولیس کے شانہ بشانہ کھڑی رہیں گی۔ مسلح افواج کے شعبہ تعلقات عامہ (آئی ایس پی آر) کے مطابق آرمی چیف، چیف آف ڈیفنس فورسز نے نیشنل پولیس اکیڈمی کا دورہ کیا جہاں عاصم منیر نے پولیس اکیڈمی کے افسران سے ملاقات کی، سینئر پولیس قیادت نے جدید سلامتی چیلنجز کے مطابق پولیسنگ کے معیار کو مزید مضبوط کرنے، پیشہ ورانہ صلاحیت بڑھانے اور ادارہ جاتی اصلاحات کو آگے بڑھانے کے عزم کا اعادہ کیا، وفاقی وزیر داخلہ محسن نقوی اور وزیر مملکت داخلہ طلاق چوہدری بھی اس موقع پر موجود تھے۔
فوج کے ترجمان ادارے نے بتایا ہے کہ نیشنل پولیس اکیڈمی پہنچنے پر کمانڈنٹ کی جانب سے فیلڈ مارشل کا گرم جوشی سے استقبال کیا گیا اور پولیس دستے نے گارڈ آف آنر پیش کیا، انہوں نے پولیس مارٹرز مونو منٹ پر پھول چڑھائے اور شہداء کیلئے فاتحہ خوانی کی، ان پولیس اہلکاروں کو خراج عقیدت پیش کیا جو امن قائم رکھنے، قانون کی بالادستی یقینی بنانے اور عوام کی حفاظت میں اپنی جانیں قربان کر چکے ہیں، فیلڈ مارشل نے دہشتگردی، جرائم اور داخلی سلامتی کے چیلنجز کے دوران پولیس کی قربانیوں کو سراہا۔
آئی ایس پی ار کا کہنا ہے کہ فیلڈ مارشل نے آئی جی پولیس، ایڈیشنل آئی جی اور دیگر سینئر پولیس افسران سے خطاب میں بین الآرگنائزیشن تعاون، جدید پولیسنگ کے طریقہ کار اور عوام کے اعتماد کو بڑھانے پر زور دیا، انہوں نے کہا کہ ایک مضبوط، پیشہ ورانہ اور عوام دوست پولیس فورس داخلی سلامتی اور قانون کی بالادستی کیلئے ناگزیر ہے، قانون نافذ کرنا پولیس کا مقدس فریضہ ہے اور مسلح افواج ہمیشہ بہادر اور پرعزت پولیس اہلکاروں کے ساتھ کھڑی رہیں گی۔
مضبوط، پیشہ ور، عوام دوست فورس داخلی سلامتی و قانون کی حکمرانی کیلئے ناگزیر ہے، فیلڈ مارشل
