پنجاب حکومت نے لاہور کو 2 حصوں میں تقسیم کرنے کی منظوری دے دی

لاہور: پنجاب حکومت کی جانب سے صوبائی دارالحکومت لاہور کو 2 حصوں میں تقسیم کرنے کی منظوری دے دی گئی۔ میڈیا رپورٹس کے مطابق لاہور کو 2 اضلاع میں تقسیم کرنے کے معاملے پر پیشرفت ہوئی ہے اور وزیراعلیٰ پنجاب مریم نواز نے لاہور کو 2 حصوں میں تقسیم کرنے کی اصولی منظوری دیدی، اس حوالے سے ہونے والے اجلاس میں فیصلہ ہوا کہ بسنت کے فوری بعد لاہور کی انتظامی ری سٹرکچرنگ کا آغاز کرتے ہوئے لاہور کی آبادی اور انتظامی دباؤ کم کرنے کیلئے شہر کو 2 حصوں میں تقسیم کیا جائے گا۔
بتایا گیا ہے کہ نئے انتظامی سیٹ اَپ سے سروس ڈلیوری اور گورننس بہتر بنانے کا ہدف ہوگا، لاہور کی تقسیم سے ڈپٹی کمشنرز، پولیس اور میونسپل نظام الگ ہوگا، شہری سہولیات کی فراہمی کیلئے لاہور کی انتظامی حدود ازسرنو متعین کرنے کا فیصلہ کیا گیا، ٹریفک، تجاوزات اور بلدیاتی مسائل کے حل کیلئے نئی انتظامی تقسیم ناگزیر قرار دی گئی کیوں کہ لاہور کی آبادی بہت زیادہ ہے، 2 حصوں میں تقسیم ہونے سے عوامی شکایات کے فوری ازالے میں مدد ملے گی، وزیراعلیٰ کی ہدایت پر متعلقہ محکموں کو تیاری مکمل کرنے کا حکم دے دیا گیا، اس حوالے سے اہم اقدامات کے باعث 9 فروری کو دوبارہ اجلاس طلب کرلیا گیا۔
وزیراعلیٰ پنجاب کا کہنا ہے کہ صوبے کے بڑے شہروں کیلئے جدید اور مؤثر گورننس ماڈل متعارف کرایا جا رہا ہے، لاہور کی تقسیم کوئی سیاسی نہیں بلکہ خالص انتظامی ضرورت ہے، لاہور کو دو اضلاع میں تقسیم کرنا عوامی سہولت اور بہتر گورننس کیلئے ناگزیر ہو چکا ہے، دو اضلاع بننے سے سروس ڈلیوری تیز، مؤثر اور عوام کے قریب ہوگی، ٹریفک، تجاوزات اور بلدیاتی مسائل کا مستقل حل انتظامی ری سٹرکچرنگ میں ہے، لاہور کے شہریوں کو فوری ریلیف دینا حکومت کی اولین ترجیح ہے، ہر فیصلے کا محور عوام کی آسانی اور شفاف گورننس ہے، 2 اضلاع بننے سے شکایات کے ازالے کا نظام زیادہ مؤثر ہو جائے گا۔