راولپنڈی:ڈی جی آئی ایس پی آر لیفٹیننٹ جنرل احمد شریف کا کہنا ہے کہ ہماری فوجی ترقیاتی حکمت عملی ہمیشہ مؤثر اور کارگر پلیٹ فارمز اور اندرونی پاکستانی ٹیکنالوجی کو شامل کرنا رہی ہے۔ مسلح افواج کے شعبہ تعلقات عامہ (آئی ایس پی آر) کےمطابق غیرملکی جریدے بلومبرگ کو انٹرویو دیتےہوئے ڈی جی آئی ایس پی آر نے معرکہ حق میں پاکستانی ہتھیاروں بشمول پاکستانی افواج میں شامل چینی پلیٹ فارمز کی مؤثر کارکردگی کی توثیق کی اور کہا کہ ایک ہفتہ قبل امریکی صدر ڈونلڈ ٹرمپ بھی 7 بھارتی طیارے مارگرائے جانے کی تصدیق کرچکے ہیں لیکن معرکہ حق میں ہندوستان پاکستان کا کوئی بھی طیارہ نہیں گرا سکا۔
لیفٹیننٹ جنرل احمد شریف کا کہنا ہے کہ پاکستان نے کبھی بھی اعداد و شمار اور حقائق سے کھیلنے یا چھپانے کی کوشش نہیں کی، اس کے علاوہ پاکستان بھارت کے ساتھ ہتھیاروں کی دوڑ میں بھی شامل نہیں ہے لیکن ہم ہرقسم کی ٹیکنالوجی چاہے وہ خود ساختہ ہو، مشرقی یا مغربی ہو اس کے حصول کے لیے تیار رہتے ہیں۔
بلومبرگ نے رپورٹ کیا ہے کہ معرکہ حق میں پاکستان کے چینی ساختہ جے 10 سی نے رافیل سمیت متعدد بھارتی فضائیہ کے طیارے مار گرائے، اگست میں پاکستان نے زی 10 ایم ای حملہ آورہیلی کاپٹرکو بھی اپنے ہتھیاروں میں شامل کرنےکا اعلان کیا، پاکستان چینی ہتھیاروں کے ساتھ ساتھ امریکی ساختہ ایف سولہ طیاروں کا استعمال بھی کرتا ہے۔
معرکہ حق میں ہندوستان ہمارا کوئی طیارہ نہیں گرا سکا، ڈی جی آئی ایس پی آر
