ٹائٹل جیتنے پر کوئٹہ کے پلیئرز کی انعامی رقم دگنی

کوئٹہ گلیڈی ایٹرز نے فائنل میں پشاور زلمی کو زیر کر کے پہلی بار پی ایس ایل ٹائٹل جیتا، پاکستان کرکٹ کی سب سے بڑی ویب سائٹ www.cricketpakistan.com.pk کے سلیم خالق کو خصوصی انٹرویو میں ندیم عمر نے کہا کہ عمر ایسوسی ایٹس سے ہماری بہت پرانی روایت چل رہی ہے کہ جب ہم کوئی ایونٹ جیتیں تو ون بونس میں اتنا ہی اضافہ خودکر دیتے ہیں، اس بار پلیئرز نے کہا کہ ایسا ہی کریں سب سے زیادہ زور سرفراز احمد نے دیا کہ روایت ٹوٹنی نہیں چاہیے،میں نے ان کا مطالبہ مان لیا ہے، پلیئرز ہمارے لیے اتنی محنت کرتے ہیں انھیں صلہ تو ملنا ہی چاہیے۔

انھوں نے کہا کہ ہم کوئٹہ جا رہے ہیں وہاں کے چیف منسٹر نے بھی انعام کا وعدہ کیا ہے کچھ اور لوگ بھی ایسا کہہ رہے ہیں، انشااللہ ہم ضرور دگنی رقم پلیئرز کو دیں گے۔ ہم ٹرافی سب سے پہلے بلوچستان کے لوگوں کو دکھائیں گے، اس کے بعد پورے پاکستان میں جشن منایا جائے گا۔