مانچسٹر: آپ کے اردگرد بھی کئی افراد ایسے ہوں گے جو بظاہر صحت مند دکھائی دیتے ہیں لیکن مسلسل کھانسی ان کا پیچھا نہیں چھوڑتی۔ اس دیرینہ بیماری کے خلاف ایک مؤثر دوا بنائی گئی ہے جسے جیفاپکسنٹ (ایم کے 7264) کا نام دیا گیا ہے۔
دنیا میں 10 فیصد بالغ اور بظاہر صحت مند افراد ایسے ہیں جو کسی مرض کے شکار نہیں لیکن مسلسل اور دیرینہ کھانسی ان کا پیچھا نہیں چھوڑتی۔ لاکھ تدبیروں کے باوجود وقتی طور پر کچھ افاقہ ہوتا ہے لیکن اس کے بعد دوبارہ کھانسی کا دورہ شروع ہوجاتا ہے۔
کئی افراد عشروں سے اس کے شکار ہیں اور ان پر کوئی دوا کارگر نہیں ہوتی۔ اب یونیورسٹی آف مانچسٹر کے سائنسدانوں نے محدود افراد پر اس کے مطالعے کے بعد کہا ہے کہ ان کی تیارکردہ نئی دوا جیفاپکسنٹ اس مرض کی شدت کم کرسکتی ہے۔ مریضوں پر اس کے بہت اچھے اثرات سامنے آئے ہیں۔
