پاکستان ویمن کرکٹ ٹیم کی لیگ اسپنر غلام فاطمہ نے سری لنکا ویمن کے خلاف اپنی شاندار پرفارمنس کو شین وارن کے نام کردیا ہے۔
تفصیلات کے مطابق کراچی میں سری لنکا ویمن ٹیم کے خلاف پہلے ون ڈے میں کامیابی کے بعد میڈیا سے گفتگو کرتے ہوئے غلام فاطمہ کا کہنا تھا کہ ٹیم میں عمدہ پرفارمنس کے ساتھ کم بیک کرنے پر خوشی ہے۔
انہوں نے کہا کہ وہ اپنی پرفارمنس کے تسلسل کو قائم رکھنے کی کوشش کریں گی۔
لیگ اسپنر غلام فاطمہ نے مزید کہا کہ شین وارن میرے آئیڈل ہیں، ان سے ملاقات کی خواہش تھی جو پوری نہ ہوسکی لیکن میں سری لنکا کے خلاف 4 وکٹیں شین وارن کے نام کرتی ہوں۔
دونوں ٹیموں کے درمیا ن سیریز کا دوسرا میچ 3 جون کو کھیلا جائے گا۔
